SIGARILYO

Sa udyok ng aking matalik na kaibigan

Minsa’y pinilit na ikaw ay matikman

Sa unang langhap ko’y di tinanggap ng katawan

Ibinuga ng aking sikmura’t kalamnan….

- – - – - – - – - – - – - – - – - – - – - – - – - – - – - – -

Ngunit di ko mawari kung bakit gusto pang

Muli kang subuka’t, muli kang madama

Sa pagkakataong ito’y napagtanto ko na

Sigarilyo pala’y masarap sa panlasa.

- – - – - – - – - – - – - – - – - – - – - – - – - – - – - – -

Sa bawat hitit ko’y langit ang pakiramdam

Sa bawat usok mo’y ligayang walang kapantayan

Kapag ika’y dala ko sa gitna ng lansangan

Tila sarili ko’y lalong tumatapang…

- – - – - – - – - – - – - – - – - – - – - – - – - – - – - – -

Hindi ko namalayang hinanap-hanap na kita

Hindi na maiwan, saan man magpunta

Kahit ito’y lihim sa aking pamilya

Basta’t ang alam ko ay kailangan kita….

- – - – - – - – - – - – - – - – - – - – - – - – - – - – - – -

Pagkatapos kong kumain, ikaw ay kasama

Inaalmusal ka tuwi-tuwina sa umaga

Kasama rin kita sa loob ng kubeta

Sa iyo sigarilyo, hindi ako magsasawa….

- – - – - – - – - – - – - – - – - – - – - – - – - – - – - – -

Ngunit ngayong ako ay matanda na

Itong sigarilyong dati kong kasama

Siya rin pala sa aking tiyak na magdadala

Sa bingit ng kamataya’t sakit na malala…

- – - – - – - – - – - – - – - – - – - – - – - – - – - – - – -

Ang aking tagubilin sa inyong kabataan

Landas ng sigarilyo ay iyong layuan

Baka malulong ka’t hindi na maiwasan

Magkakaroon ka ng telebisyon sa katawan….