Z-obra na! T-ama na! Exit na!

Zobra na! Tama na! Exit na!

 □  Anastacio Cruz  □  

Gamit ang diwa at aking panulat 

Lumakas yaring loob na aking isiwalat 

Ang naghihimutok kong damdaming maalab 

Sa kabuktutang sa aki’y inyong pinamulat.

 —————————————–

Bakit nga ba? Tanong ko sa aking sarili 

Sa lahat ng tao, sa dinami-dami 

Bakit sa labi ko kailangang mamutawi? 

Bakit sa tulad kong ang isipa’y inosente? 

—————————————–

Bakit karamihan ay tumatahimik lang? 

Bakit lahat kayo ay parang walang muwang? 

Sa mga nangyayari sa buong sambayanan 

Bakit di ka bumangon at simulan ang laban? 

—————————————————- 

Ako’y sumunod lamang sa agos ng pangyayari

 Na aking nasaksihan araw-araw, gabi-gabi

 Laman ng balita sa radyo at tv 

Mga anomalya sa likod ng ZTE. 

——————————————————–

Imbis na harapin itong aking libro 

Ay aking ginigising Sambayanang Pilipino 

Batid kong kailangan ng tulang ganito

 Hangad kong lahat nawa tayo’y mangatuto. 

——————————————————–

Mura man ang isip ko’y nababatid ko na 

Kung ano ang mali’t kung ano ang tama 

Sapat ng pagbatayan nitong aking akda 

Sapat ng loobing gisingin ang madla. 

———————————————-

Malakas ang loob ng ating Presidente

 Hindi raw siya bababa anuman ang mangyari 

Mananatili siya sa pagiging tiwali 

Hindi ako papayag! Hindi maaari!

 ——————————————

Batid ko ang hirap ng aking ina’t ama 

Sa pagbabayad ng buwis dito sa’ting bansa 

Makikinabang lang pala’y si Pangulong Gloria 

At saka si FG na kanyang asawa. 

———————————————————

 Wala naman talagang malinis na pulitiko

 Lahat ng mga iya’y may nais matamo 

Sa laki ng gastos sa pangangandidato 

Hangad nila’y makabawi’t higitan pa ito. 

———————————————————-

 Si Secretary Ermita ang dakilang tagapayo

 Tagapagtanggol lagi ng ating Pangulo 

Hindi natitinag sa lahat ng gulo 

Pagkat malaki ang BONUS sa sweldo. 

————————————————–

 Si Deputy Secretary Manuel “Manny” Gaite, 

Nagbigay ng perang malaking-malaki

 Kay Rodolfo Lozadang testigo ng ZTE 

Sa liit ng sweldo niya’y GALANTENG-GALANTE.

 —————————————————— 

Si Leandro Mendoza, pinuno ng DOTC 

Lagi ring nakadikit kay Madam Presidente 

Sa buong kapulisan noo’y naging hepe 

Ano ang karapatang maging Cabinet Secretary?

—————————————————–

 Si Lito Atienza na sipsip sa Pangulo 

Sa pagkidnap kay Lozada ay siyang pasimuno 

Laging nagpapasikat sa mahal niyang amo 

Sa DENR nakaupong SEÑORITO. 

—————————————————— 

Si CHED Chairman Romulo Neri 

Hindi maiwan-iwan mahal na Presidente 

Siya daw ang susi sa misteryo ng ZTE

 PATRIOTIC FUND niya’y binigay na ni FG. 

———————————————-

 Si Hermogenes Esperon nananatiling tapat

 Pagkat BIGAY ni Gloria sa bulsa niya’y sumasapat 

Ang mga sundalo’y may bonus ang lahat 

Baka kasi magkudeta, plano nila’y pumalpak. 

———————————————-

Si Avelino Razon na nagmamagaling 

Mga kayamana’y sa kaban nanggaling 

Mga raliyista’y halos kanyang patayin 

Natatakot sigurong lihim nila’y mabuking.

 ———————————————–

 Si Mike Defensor na naging talunan

Sa pagkasenador nung nakaraang halalan

 Ngayo’y sumasawsaw sa mga usapan 

Balak pa sigurong kumandidato na naman. 

————————————————-

NBN 4, RPN 9, at IBC 13, 

Mga istasyong madalas gamitin 

Ng ating Pangulo sa masamang hangarin 

Litaw ang kanilang budhing maiitim. 

——————————————–

 Bakit hindi pakinggan si Jun Lozada? 

At saka itong bagong si Ginoong Madriaga? 

Ang unang testigong si Joey De Venecia 

Sila ang kasagutan sa tanong ng masa. 

————————————————-

  Sila ay patunay na ‘di ako nag-iisa 

Sa panawagang madla’y gumising na 

Hangad kong lahat tayo’y maging sama-sama 

Sa isang hangaring patalsikin si Gloria. 

————————————————

 Pinapangarap ko ang isang pagbabago, 

Nitong ating sistema, nitong mga pulitiko,

 Sa dalawang People Power, bayan ay natuto, 

Ang hindi natuto’y yaong mga nakapuwesto. 

——————————————–

 Kaya’t dinggin mo itong aking panawagan 

Atin nang tugunan ang tawag ng kalikasan 

Kailangang si GLORIA ay ating palitan 

Ngunit hindi si Noli ang tamang kasagutan. 

————————————————-

 Batid naman nating wala ding nagagawa 

Itong Bise-Presidenteng sangkot din sa anomalya 

Hindi natin kailangan ng kaparis ni GLORIA, 

Tayo ng pumili sa paraan ng demokrasya. 

—————————————————

Tayo’y magdaos ng SNAP ELECTIONS 

Upang pumili ng bagong Administrasyon 

Hayaan ang bayan sa pagdedesisyon, 

Kumilos na tayo! Kailangan na ngayon! 

———————————————

Madlang Pilipinas kung mangyaring ganap 

Ang aking tinuran, ang aking pangarap 

Mga kababaya’y maaahon sa hirap 

Pagka umalis na itong Pangulong KURAP! 

————————————————

 Bigkis ng mga tao simulang silaban 

At kapag naginit ay lalong tatapang 

Pagbabagong ganap ang ating kailangan 

Pangarapin nating SIMULAN ANG LABAN! 

————————————————

 Ang aking panawagan sa TIWALING si GLORIA 

Sa mahabang panahon siguro nama’y sapat na 

Dinggin ang panawagan ng Pilipinong Masa; 

Zobra na! Tama na! Exit na!